Víkari.is

BÍ/Bolungarvík vann 7-1 stórsigur á Hvöt frá Blönduósi í 2. deild karla í knattspyrnu í kvöld en leikurinn fór fram á Torfnesi á Ísafirði. Með sigrinum styrkir lið BÍ/Bolungarvíkur stöðu sína í 2. sæti deildarinnar með 32 stig eftir 14 leiki en Víkingur Ólafsvík er á toppi deildarinnar með 33 stig úr 13 leikjum.

Það var bolvíski miðjumaðurinn Gunnar Már Elíasson sem braut ísinn fyrir heimamenn í kvöld með glæsilegu langskoti upp í skeytin. Í kjölfarið komu þrjú mörk frá Jónmundi Grétarssyni og svo önnur þrjú mörk frá bolvíska framherjanum Andra Rúnari Bjarnasyni. Til gamans má geta þess að Andri Rúnar skoraði þrennuna á aðeins 7 mínútna kafla í leiknum og er það ansi vel af sér vikið hjá þessum unga og efnilega knattspyrnumanni.