Víkari.is

Bolvíski atvinnuflugmannsneminn Andri Jónsson hlaut hæstu meðaleinkunn sem gefin hefur verið á bóklegu atvinnuflugmannsnámi Flugmálastjórnar Íslands með einkunnina 9,8 í gær. Er þetta hæsta einkunn sem gefin hefur verið frá því að atvinnuflugmannspróf voru haldin skv. reglum JAA eða Joint aviation authorites sem standa fyrir Samtök Evrópskra flugmálastjórna en slík próf voru fyrst haldin árið 2000. Andri útskrifaðist einnig með hæstu einkunn úr bóklegu atvinnuflugmannsnámi frá Flugskóla Íslands á dögunum með meðaleinkunnina 9,4. Fékk hann sérstaka viðurkenningu fyrir framúrskarandi árangur í náminu og hlaut að launum flugtíma á flugvél í eigu flugskólans og tíma í flughermi.