Víkari.is - Fréttavefur Bolvíkinga
Munnmælasögur | 5.2.2012 15:27:44 | Kristján Jónsson
Bolvískar munnmælasögur nr. 68

Maður er nefndur Sævar Sölvi Sölvason. Snævarr á það til að vera nokkuð seinheppinn. Að vori til fyrir nokkrum árum heimsótti þáverandi formaður Sjálfstæðisflokksins, Geir H. Haarde, kosningaskrifstofu D-listans í Bolungarvík í aðdraganda kosninga. Vöfflur og annað bakkelsi var á boðstólum eins og gengur og gerist og Snævar lét ekki sitt eftir liggja í veitingum. Hann þreif rjómasprautuna og ætlaði sér að skella vænni gusu á vöffluna. Snævar átti erfitt með að átta sig á því hvernig tækið virkaði en eftir nákvæmar leiðbeiningar frá Dóru Línu tókst honum betur upp. Þegar rjómasprautann gaf sig loksins var Snævar ekki einungis með fullan disk af rjóma heldur voru dökk jakkaföt forsætisráðherrans þáverandi einnig orðin hvít.

Sama sumar sóttu önnur og ekki minni fyrirmenni Bolungarvík heim, en þá voru þeir Geir Þorsteinsson formaður KSÍ og Þórir Hákonarson framkvæmdarstjóri KSÍ, á ferðinni. Eftir að hafa fylgst með knattspyrnuleik hjá hinu þá hæverska stórveldi BÍ/Bolungarvík, sátu þeir fyrir utan Langa Manga og drukku í sig bjórinn og veðurblíðuna. Þeir settust hjá nokkrum fótboltastrákum og fóru að ræða við þá um leikinn og 3. deildina. Þetta voru kunningjar Snævars, sem hafði brugðið sér frá og Geir hafði sest í sætið hans. Snævar kom askvaðandi og sagði formanni KSÍ að hundskast úr sæti sínu. Geir sagði kurteisilega að hann væri nú bara að ræða aðeins við strákana um fótbolta. "Þú hefur ekki hundsvit á fótbolta. Þú ert bara einhver sjóari á Flateyri," svaraði Snævar og var hinn versti. Geir muldraði eitthvað um að hann hefði einhverja innsýn í fótboltann en Snævar lét ekki svipta sig stoltinu og hélt áfram, hálfu ákveðnari en áður: "Ég hef oft séð og þekki þig alveg. Þú ert á sjó á Flateyri." Formaður KSÍ hrökklaðist í burtu enda sá hann að þessi maður myndi ekki gefa sig. Skemmtilegt er hins vegar að segja frá því að Geir Þorsteinsson spilaði eitt sumar með Gretti á Flateyri fyrir langa löngu.

 

Sagnahefðin hefur í gegnum tíðina verið rík á meðal Víkara sem og annara Vestfirðinga. Kristján Jónsson hefur á undanförnum árum skrifað sögur á bloggsíðu sína sem hann hefur kallað Munnmælasögur. Víkari.is hefur nú fengið leyfi til þess að birta nokkrar af þessum sögum hér á síðunni en þær hafa allar birst áður á www.bolviskastalid.blogspot.com og eru merktar eins og þær heita á bloggsíðu Kristjáns. Vonandi hafa lesendur Víkara ánægju af þessu enda er þetta einungis til gamans gert. Lifi sagnahefðin!

Ef einhverjar athugasemdir vakna vegna þessa er hægt að senda Kristjáni póst á kris@vikari.is


Myndbandið
Næstu viðburðir
Ekkert fannst!
Nýjustu myndirnar
Smelltu til að skoða Vígsla snjóflóðagarðanna
Snjóflóðavarnargarðarnir Vörður og Vaki í Bolungarvík voru vígðir laugardaginn 20. september.