Víkari.is - Fréttavefur Bolvíkinga
Menning og mannlíf | 27.2.2019 10:44:52 |
Eden: Bolvísk kvikmynd væntanleg í bíó

Kvikmyndin Eden verður frumsýnd 9. maí næstkomandi en leikstjóri og höfundur myndarinnar er Bolvíkingurinn Snævar Sölvi Sölvason. Eden er önnur mynd Snævars Sölva sem ratar í kvikmyndahúsin en fyrri myndin var gamanmyndin Albatross sem kom út árið 2015. Albatross fjallaði um líf og störf golfvallarstarfsmanna í Bolungarvík og var að öllu leyti tekin upp í Víkinni fögru.

 

Kvikmyndin Eden er villt blanda af spennu og kómík en hún segir frá parinu Lóu og Óliver sem framfleytir sér með fíkniefnasölu en þráir ekkert heitar en að elta drauma sína. Þegar þau lenda upp á kant við undirheimaöflin ákveða þau að taka málin í sínar hendur og hefst þá barátta upp á líf og dauða. Með aðalhlutverk í Eden fara Telma Huld Jóhannesdóttir, sem hefur getið sér gott orð á leiksviðinu og í kvikmyndum og sjónvarpsþáttum á borð við Illsku, Webcam og Rétti, og Hansel Eagle (Ævar Örn Jóhannsson) en hann fór með aðalhlutverkið í gamanmyndinni Albatross sem kom út árið 2015.

 

Myndin skartar einnig leikurunum Arnari Jónssyni og Steinunni Ólínu Þorsteinsdóttur en önnur hlutverk eru fyrst og fremst skipuð ungum og upprennandi leikurum. Þar á meðal eru Tinna Sverrisdóttir, Gunnar Maris, Blær Hinriksson, Valgeir Skagfjörð, Einar Viðar G. Thoroddsen, Hjalti P. Finnsson og Róbert Gíslason, sonur leikaranna þjóðkunnugu Eddu Björgvinsdóttur og Gísla Rúnars.

 

Kvikmyndatónlist samdi Magnús Jóhann Ragnarsson og lagasmíðar eru í höndum hins ísfirska Þormóðs Eiríkssonar. Magnús og Þormóður hafa á síðustu misserum verið mjög eftirsóttir þrátt fyrir ungan aldur. Magnús hefur spilað með ótal tónlistarmönnum, þar á meðal Friðriki Dór, Sölku Sól, Moses Higtower, GDRN, Flóna og samið kvikmyndatónlist fyrir stuttmyndir, en Þormóður hefur gert garðinn frægan undanfarið í íslensku hiphop-senunni og samið lög fyrir Jóa P og Króla, Herra Hnetusmjör, Huginn og marga aðra. Í stiklu myndarinnar má heyra dæmi um samstarf þeirra félaga, þar sem hljómarnir í fyrri hluta eru í höndum Magnúsar en rapplagið í þeim seinni er eftir Þormóð, í nánu samstarfi við nýstirnið Lukku Láka (Ísak Sigurðarson) sem ljær laginu rödd og texta.


Það er góður hópur Vesfirðinga sem kemur að gerð kvikmyndarinnar Eden. Eins og áður segir er leiksstjórinn og höfundurinn Snævar Sölvi Sölvason Bolvíkingur í húð og hár og er hann sonur Sölva Rúnars Sólbergssonar og Birnu Guðbjartsdóttur. Hansel Eagle eða Ævar Örn Jóhannsson er einnig borinn og barnfæddur Bolvíkingur, sonur Jóhanns Þórs Ævarssonar og Guðrúnar Dagbjartar Guðmundssdóttur. Um upptöku og klippingu myndarinnar sá Logi Ingimarsson en hann er einmitt ættaður úr Bolungarvík, Logi er dóttursonur Harðar Snorrasonar og Margrétar Kristínar Jónasdóttur og um tónlist í myndin sá hinn ísfirski Þormóður Eiríksson.

 

Hér má sjá trailer/stiklu úr myndinni Eden: https://www.youtube.com/watch?v=VkZdlrdrf7k

 


Myndbandið
Næstu viðburðir
Ekkert fannst!
Nýjustu myndirnar
Smelltu til að skoða Vígsla snjóflóðagarðanna
Snjóflóðavarnargarðarnir Vörður og Vaki í Bolungarvík voru vígðir laugardaginn 20. september.