Víkari.is - Fréttavefur Bolvíkinga
Fréttir | 13.2.2020 10:23:56 |
Tryggið lausamuni í dag!

Íbúar eru beðnir um að huga að lausum munum í dag fyrir föstudaginn og koma í veg fyrir fljúgandi ruslatunnur og að tryggja allt lauslegt útivið. 

 

Veðurspáin fyrir föstudaginn er einkar hörð. Veðurhæð eykst með morgninum og veðrið verður í hámarki um miðjan dag með snjókomu og éljagangi og fer ekki að ganga niður fyrr en um miðnætti.

 

Það er veruleg hætta á að lausir munir eins og ruslatunnur fjúki í veðrinu og skemmi bíla eða brjóti rúður.

 

Þeir sem lenda í vandræðum vegna veðursins eru hvattir til að hringa í 112 og óska aðstoðar en ekki að hringja í meðlimi björgunarsveitarinnar.

 

Lögreglan á Vestfjörðum ráðleggur fólki að vera ekki á ferðinni á milli þéttbýliskjarna á föstudaginn nema að brýna nauðsyn beri til. Búast má við rafmagnstruflunum, að vegir teppist eða að þeim verði lokað ef hætta á ofanflóðum skapast.

 

Spá Veðurstofunnar fyrir Vestfirði hljómar svona:

 

Norðaustan stórhríð, 20-28 m/s. Búast má við mjög hvössum og varhugaverðum vindhviðum við fjöll, staðbundið yfir 40 m/s. Einnig er spáð mikilli snjókomu eða éljagangi með lélegu skyggni og versnandi akstursskilyrðum. Víðtækar samgöngutruflanir líklegar, og ekkert ferðaveður er á meðan appersínugul viðvörun er í gildi. Fólki bent á að sýna varkárni og fylgjast með veðurspám. Talsverður áhlaðandi, hækkuð sjávarstaða og mikil ölduhæð fylgir veðrinu.

 

Myndin sýnir spákortið fyrir föstudaginn 14. febrúar kl. 12:00.


Myndbandið
Næstu viðburðir
Ekkert fannst!
Nýjustu myndirnar
Smelltu til að skoða Íþróttamaður Bolungarvíkur 2019
Hóf Íþróttamanns ársins í Bolungarvík 2019 var haldið í Félagsheimilinu sunnudaginn 12.janúar 2020. Margir íþróttamenn fengu viðurkenningar og var það Mateusz Klóska sem fékk titilinn íþróttamaður ársins. Guðbjörg Stefanía Hafþórsdóttir tók eftirfarandi myndir.