Víkari.is - Fréttavefur Bolvíkinga
Fréttir | 28.5.2017 10:09:28 |
Starfstöðvar sýslumanns á norðanverðum Vestfjörðum sameinaðar

Í hagræðingarskyni hefur verið ákveðið, að sameina starfsemi embættis Sýslumannsins á Vestfjörðum, sem verið hefur í Bolungarvík og á Ísafirði, undir einu þaki frá og með 1. júní nk. Er miðað við að starfsemin verði á skrifstofu embættisins að Hafnarstræti 1 á Ísafirði, en hætt verði að veita þjónustu í  útibúinu í Bolungarvík. Þar hafa verið tveir starfsmenn sem auk almennrar afgreiðslu önnuðust innheimtu vanrækslugjalds á landsvísu. Hafa þeir við þessi tímamót kosið að láta af störfum hjá embættinu.

 

Í reglugerð nr. 1151/2014 um umdæmi sýslumanna er kveðið á um að útibú skuli vera frá Sýslumanninum á Vestfjörðum í Bolungarvík og á Hólmavík, sýsluskrifstofa á Ísafirði en aðalskrifstofa embættisins á Patrekfriði.  Í útibúum skal veitt þjónusta á tilteknum tímum eftir því sem sýslumaður ákveður.  Hefur embættið ritað dómsmálaráðherra bréf þar sem óskað er eftir að reglugerðinni verði breytt þannig að aðeins sé gert ráð fyrir einni starfsstöð á norðanverðum Vestfjörðum og lagt til að hún verði á Ísafirði.

 

Jónas Guðmundsson, sýslumaður á Vestfjörðum, kveðst harma að hafa þurft að grípa til þessa úrræðis en eilífar kröfur um hagræðingu kalli á þessa aðgerð, sem auk fjárhagslegs sparnaðar ætti að leiða til aukinna samlegðaráhrifa á skrifstofunni á Ísafirði. Þá sé stöðugt vaxandi samgangur milli staðanna og auðveldara og öruggra að komast á milli auk þess sem bætt tækni auðveldi samskipti við sýslumenn óháð búsetu. Þá megi nefna að þrír Bolvíkingar vinni á skrifstofunni á Ísafirði. 

 

Vill Jónas  þakka Bolvíkingum samfylgdina í Ráðhúsinu í Bolungarvík þau 25 ár sem hann bjó í Bolungarvík og starfaði þar sem og þann tíma sem útibúið á jarðhæðinni hefur verið stafrækt og jafnframt bjóða Bolvíkinga velkomna á skrifstofu embættisins á Ísafirði hvenær sem á þarf að halda.


Myndbandið
Næstu viðburðir
Ekkert fannst!
Nýjustu myndirnar
Smelltu til að skoða Vígsla snjóflóðagarðanna
Snjóflóðavarnargarðarnir Vörður og Vaki í Bolungarvík voru vígðir laugardaginn 20. september.